Cleachd na ceangalan gu h-ìseal gus nithean co-cheangailte ris a lorg

AINM-ÀITE: Srath Pheofhair
LINN: 1940an; 1950an
SGÌRE: Inbhir Pheofharain
SIORRACHD/PARAISTE: ROS:Fothraitidh
TABHARTAICHE: Leabharlainn na Gàidhealtachd
AINM A' CHRUINNEACHAIDH: Postcards
DEALBHADAIR: J Valentine & Co.

Tha a' chairt seo a' sealltainn Srath Pheofhair o Bhràigh na h-Eaglais. 'S e an Eaglais Shaor, a dh'fhosgail ann an 1886, a chithear anns an dealbh. Tha stìoball annasach oirre, agus tha i ann an àite àrd os cionn a' bhaile. Nas fhaide suas Bràigh na h-Eaglais, tha Comann Goilf Spà Srath Pheofhair, a stèidhicheadh ann an 1888. Tha sealladh farsainn on raon-goilf bhrèagha seo sìos Gleann Pheofharain chun an Eilein Duibh agus an iar gu beanntan Fainich.


Tha Srath Pheofhair 4 mìle (6cil) an iar air Inbhir Pheofharain ann an gleann Abhainn Pheofharain. Dh'fhàs e cliùiteach air sgàth gun do lorgadh fuarain phronnaisg ann anns na 1770an. Aig toiseach an 19mh linn, dh'ìnnis fear à siorrachd Obar Dheathain, dham
b' ainm an Dotair Moireasdan, mun chumhachd leighis aig an uisge, agus air sgàth a chomhairle, thogadh a' chiad sheomar-pumpaidh de dh'fhiodh ann an 1819.

Le taic mhòr bho Bhan-Iarla Chrombaidh, dh'fhàs Srath-Pheofhair mar Spà Bhictòrianach. Chuidich e gu mòr gun do dh'fhosgail meur Srath Pheofhair de Rèile Inbhir Pheofharain agus an Eilein Sgitheanaich ann an 1885. Thogadh iomadh taigh-òsta spaideil agus taigh mòr Bhictòrianach a ghabhadh an luchd-turais a bha tighinn gu cunbhalach air sgàth an uisge. Gu àm a' chiad chogaidh, bhiodh mòran a' tighinn dhan bhaile, ach an dèidh sin cha robh uimhir de dh' ùidh ann.

An-diugh, bidh luchd-turais a' tighinn a-rithist gu Srath Pheofhair, agus a' fuireach anns na taighean-òsta agus taighean-aoigheachd Bhictorianach. Am measg nan goireasan anns a' bhaile, tha Taigh-tasgaidh na Cloinne, Pàillean Spàtha Srath Pheofhair, agus an Seòmar-Phumpaidh Àrd far am faigh iad blasad dhen uisge

Tha an dealbh seo san earrainn 'An-diugh is an-dè'